Monchu ye un home sabiu; atentu, activu y cultiváu, al que nestos tiempos últimos —coses de la edá, de la mía en particular—atrévome a considerar amigu. O, si me permiten, dalgo más qu’amigu: cuento que si los asturianos, o los asturianistes, fuéremos una tribu —que lo somos— Monchu’l cura sería’l nuestru druida.
José Ramón García Fernández nació, p’a mediaos del sieglu pasáu, nel añu 1936, nuna aldeína de Villaviciosa. De tola vida quiso ser sacerdote y hai verdá en que, d’aquella, bien de vocaciones nun yeren otro qu’una manera d’algamar estudios y posibles que —fuera los seminarios— nun teníen acomodu ente la xente del común. Nun resultó esi’l casu de Monchu: por voluntá propia, por ayudar, por aportar —en xunto, porque quiso— fizo carrera dientru la Ilesia, conoció buenos y malos enseñantes, y caltuvo tola vida esa vocación, esa coherencia, cristiana, qu’otros, col pasu’l tiempu y les circunstancies fueron dexando al par.
Sacerdote, intelectual, artista, pintor de talentu y escritor a última hora… el calificativu de sabiu nun-y vien grande a Monchu’l cura. Y seique por eso —polo humanista y fondu del so conocimientu— fizo de la cenciellez y la normalidá la so manera vivir y comportase. De mui nuevu, anduvo’l país d’una banda a otra, per distintes parroquies, rurales y urbanes, onde, de primer mano, conoció tierres y xentes diverses, asumió responsabilidaes, y, con uno y con otro, acabó, per bien d’años, de capellán del Hospital Central d’Uviéu, l’antiguu.
Y esi contactu cola xente, en momentos y hores difíciles, cuando les alegríes son intenses, o ye la muerte la que nos mira de cara, terminó aprendiendo-y tovía más la importancia d’atender, de dar consuelu; de, primero y más nada, acompañar. Una escuela, la del tratu, que vieno a complementa-y —cola práctica— tolo que los llibros y los saberes fueron aporta-y primero cola teoría. Por esa humanidá, a poques persones cuadren-y meyor —aparte lo de sabiu— el calificativu de buenu: conoz lo más y lo menos del mundu y de resultes d’ello—como tolos grandes— enséñase como humilde y tolerante. «Dios nos llibre de los puros» ye ún de los sos munchos dicires.
Pero nun hai que se confundir: Monchu tien carácter, y opinión; y nun ye precisamente de los de callar. Seique por eso — entemecío colo respetuoso del so discursu— da gustu parolar con él, presta sentilu y pregunta-y y aldericar; y, nes tertulies qu’entamamos, bien de vueltes acabamos atendiendo tol mundu encantaos pa lo que desplica: mesmo los oríxenes célticos de la Ilesia primera asturiana, el significáu últimu de les iconografíes ortodoxes o, qué sé yo, la manera d’entender polos nuestros paisanos el pasu de les estaciones.
País, relixón y cultura son —nun podía ser d’otra manera— les materies que lleva Monchu aprendiendo, y aprendiéndonos, de tola vida. Y con esto último d’aprendiéndonos refiérome, en concretu, a los tertulianos que tenemos la suerte de compartir con él mesa, mantel y palabra. Hai ya unos cuantos años, un grupu mui particular de paisanos —quiero dicir, de naturales y amigos del país— bonacibles y repunantes, xuntámonos, a la nuestra manera, los últimos vienres de cada mes namás que pa conversar ente nosotros.
Ideolóxicamente hailos d’un sitiu y d’otru, hailos más lliberales y más izquierdistas, hailos empezando la treintena y hailos doblando esa edá, hailos de distintos oficios y profesiones. Pero, con too y con ello, dos coses caltenemos pa en común: un apreciu polo nuestro y un convencimientu fondu de que nenguna patria paga la pena si nun se construi con pluralidá y tolerancia. Por eso aldericamos con pasión, por eso sentimos con respetu a los que piensen distinto, por eso consideramonos asturianistes primero de nada y por eso punximos-y a la nuestra tertulia el nome de «25 de mayu»: como recordatoriu a aquellos patriotes que se proclamaron, allá pa 1808, soberanos énte l’Imperiu más poderosu d’Europa; y como manera de remembranos que nun queremos otro que conocer tolo que fuimos, reconocer a tolos que fueron primero de nos, y aportar tolo que podamos a un futuru nel que seyamos quien.
Y ye verdá qu’a Monchu esi calificativu d’asturianistes nun-y gusta por demás; y arguméntalo: dizque ye un términu que toca aplicar meyor a los estudiosos; a los que faen de lo asturiano una materia d’estudiu, una especialidá, una disciplina teórica d’analís. Y que lo que nosotros somos ye otra cosa: asturianos; namás eso. Y nun vamos a quita-y la razón: somos xente asturiano, conscientes, eso sí, de la nuestra condición, de la nuestra nación; y, polo tanto, interesaos n’apreciala, caltenela y vela medrar.
Y ye qu’uno lleva a lo otro. Como tamién-y gusta repetir al nuestru druida particular namás somos apreciar lo que conocemos y de siempre vamos conocer meyor lo qu’apreciamos. Por eso, tamién en palabres d’elli, lo de da-y vueltes al etenru problema de si tol descreimientu y despreciu respective al nuestru patrimoniu ye más un productu de la ignorancia o más de la mala fé da un poco igual. Da igual si los nuestros gobernantes nun saben o nun quieren. A lo último, lo uno y lo otro retroaliméntase nun círculu cafiante que nos achapla: tanto da si dexamos caer —o directamente valtamos— los nuestros horros, pintures, palacios, casones y palabres, por efectu d’una iconoclastia provinciana, d’una visión cosmopaleta o d’una ideoloxía pan-hispánica mesetaria grande y llibre; o si, por contra, facémoslo namás porque somos tan descreyíos, ignorantes y necios que nun-y sabemos dar valir a les nuestres ayalgues y acabamos vendiendo tola nuestra heredá por un platu llenteyes, fabes o cachopu. Y da igual porque, a lo último, la solución a va pasar siempre per un riegu namás; la repuesta única al nuestru decaimientu ye la cultura, el conocimientu y la ilustración: somos y queremos ser.
Y metíos n’estes, col aquello de pasar de les palabres a los fechos, ye cuando los componentes d’esa tertulia asturianista« 25 de mayu», ayudaos por bien d’otros—porque Monchu tien alredor muncha xente que lu aprecia— aneciamos en que’l nuestru druida particular tinía que posar por escritu lo más de tolo que nos tenía aprendío: una amuesa de tolo que tinía estudiao y concluyío respective a la consideranza y formación del nuestru país como nación histórica; y tamién de la importancia que la nuestra Ilesia nesi desarrollu.
Nun podíemos dexalo pasar: naide más podía facelo; namás Monchu podía escribir un llibru que, de nun facese, diba quedar valeru. Y, conscientes que pasar les idees al papel nun ye xera fácil, nin cosa pa despreciar, entós mesmo comprometímonos firme n’aidalu y emburrialu —necios y repunantes como somos— pa que nun quedar ensin acabación esi proyectu.
Siete borradores depués, milenta correcciones mediante y muncha, muncha disciplina d’escribanu medieval, oficiu propiu d’artesanu del país y paciencia de monxu constructor de catedrales mientres otros desesperean, acabamos teniendo’l resultáu nes nuestres manes: Astures, gens hispaniae, Iglesia local y nación histórica ye’l llibru col que’l nuestru druida, Monchu’l cura, estrenose como escritor.
Igual que desarrollo la so obra pictórica, con talentu y constancia, Monchu llevantó agora esta pieza d’ensayu, pensamientu y reflexón: con bien d’años, díes y hores dedicaes a conocer, esfrutar y estudiar a los grandes maestros pa treslledar depués, con procuru, la so particular y arreyada visión de les coses. Aportando, porque mesmo nun arte que n’otru, lo importante ye contribuir, sumar, dar al común una blima nueva; un eslabón más d’esa cadena llarga na que tol mundu seya a sentise parte.
Dar, eso ye lo que tien fecho Monchu tola vida. Y, namás por dicir, la biblioteca pública de la so Villaviciosa hai tiempu qu’agospia una donación suya de llibros —primero de nada d’arte— qu’elli mesmu atropara, colos años, d’equí y d’allá, nun llabor calláu y precisu, p’acabar contando qu’onde meyor taben yera a disposición del común, del pueblu; de los suyos. Y ellí acomoden dende hai un tiempu: naquelles estanteríes, tan bien cuidaes, esperando que venga visitalos quien quiera y puea; y que, d’equí pa en delantre, seya completalos cola llectura de la propia obra escrita pol nuestru autor, pol nuestru druida particular, pol nuestru Monchu’l cura que, a lo último, con esa Astures, gens hispaniae, Iglesia local y nación histórica resume y espeya tolo que lleva aprendío y estudiao de lo munchu que somos, fuimos y queremos ser nosotros: los paisanos, homes y muyeres, d’esti requexu atlánticu del mundu.
Nada en particular; bien poca cosa: namás una contribución irrepetible y impagable cola que’l nuestru sabiu maliayu nos fai más conscientes, más cultos y meyores, mientres seguimos contando con elli pa la viniente tertulia. Y encantaos.